Man cefnogi

Os ydych chi'n profi cam-drin, neu'n cefnogi rhywun sy'n ei brofi, dydych chi ddim ar eich pen eich hun.

Gall cam-drin ddigwydd i unrhyw un – menywod, dynion, merched neu fechgyn. P'un ai ydych yn chwilio am gymorth neu'n ceisio helpu rhywun sy'n bwysig i chi, mae'r dudalen hon yn cynnig arweiniad a gwybodaeth i'ch helpu i gymryd y camau nesaf. 

Dydych chi ddim ar eich pen eich hun. 

Gall dweud wrth rywun am eich profiad eich helpu i ymdopi â'r cam-drin a chael cymorth ychwanegol os oes ei angen arnoch. Gall hynny gynnwys cymorth emosiynol, cymorth ymarferol, cyngor iechyd a chymorth cyfreithiol. Nid oes rhaid i chi fynd drwy hyn ar eich pen eich hun. 

Nid oes unrhyw bwysau arnoch i wneud hyn, ac nid oes un person cywir neu anghywir i ddweud wrthyn nhw. Gallech ddechrau gyda ffrindiau neu deulu, neu rywun yn eich cymuned rydych chi'n ymddiried ynddyn nhw. 

Pan fyddwch yn barod, a dim ond os ydych chi eisiau, gallech ddewis siarad â sefydliad cymorth arbenigol. Nid oes angen i chi adrodd am unrhyw beth, na chynnwys yr heddlu, i gael cymorth. Pa fath bynnag o gymorth a ddewiswch, mae pobl a fydd yn gwrando ac yn eich credu.

Gallwch hefyd ddewis adrodd am yr hyn a ddigwyddodd i chi mewn ffordd fwy ffurfiol, boed hynny yn y gwaith, yn y brifysgol neu yn yr ysgol, neu drwy gysylltu â'r heddlu. 

Cofiwch, mewn argyfwng, ffoniwch 999. Os nad yw'n ddiogel i siarad, gallwch wasgu 55 a chewch eich trosglwyddo i weithredwr galwadau heddlu sydd wedi'i hyfforddi i ymdrin â 'galwadau distaw', a dylai fod yn gallu nodi eich lleoliad.