વેબસાઇટનો પૂરતો સારાંશ

કોઈ વ્યક્તિએ દુર્વ્યવહારના ડરમાં જીવવું જોઈએ નહિ.

ચાલો આપણે બધા પરિવર્તનના ભાગ બનીએ.

દરેક વ્યક્તિ સ્ત્રીઓ અને છોકરીઓને સુરક્ષિત રાખવા માટે કંઈક કરી શકે.

સ્ત્રીઓ અને છોકરીઓ અપ્રમાણસર દુર્વ્યવહાર અને સતામણીની ભોગ બને છે.

તમે આ સમસ્યાને પહોંચી વળવા માટે તેમજ પીડિતો માટે માહિતી અને સહાયતા પૂરી પાડવા માટે કઈ રીતે મદદ કરી શકો તે આ પાન બતાવે છે.

જો તમારી સાથે દુર્વ્યવહાર થયો હોય તો તમને મદદ કરી શકે એવાં કેટલાંક સંગઠનો છે. તે ભાવનાત્મક સહાયતા, વ્યાવહારિક સહાયતા, સ્વાસ્થ્યની સલાહ અથવા કાનૂની સહાયતા હોઈ શકે છે.

જેઓની સાથે દુર્વ્યવહાર થયો હોય એવા કેટલાક લોકોને ડર, શરમ અથવા મૂંઝવણનો અનુભવ થઈ શકે છે.

કેટલાક લોકોને એવી ચિંતા હોય છે કે અમારી વાત કોઈ માનશે નહિ અથવા અન્ય લોકો શું વિચારશે તેની ચિંતા હોઈ શકે છે.

કેટલાક લોકો પોતાના સમાજમાં કોઈ વ્યક્તિ પર આરોપ મૂકતાં ડરે તેમ બની શકે છે અને પોતાને તથા પોતાના કુટુંબ સાથે શું થઈ શકે એ વિશે ચિંતા હોઈ શકે છે.

જે કંઈ પણ થયું હોય, તમને મદદ કરવા માંગતા લોકો અને સંગઠનો છે.

તમારે સમસ્યાનો એકલા સામનો ન કરવો જોઈએ. કોઈ વ્યક્તિને જાણ કરવી હિતાવહ છે.

એ વ્યક્તિ મિત્ર, કુટુંબીજન અથવા તમારા સમાજમાં તમે જેનો વિશ્વાસ કરતા હો એવી વ્યક્તિ અથવા પોલીસ અધિકારી કે ડૉક્ટર જેવી કોઈ હોદ્દાધારી વ્યક્તિ હોઈ શકે છે. 

આ પાન પર જણાવેલી સંસ્થાઓ તમારી ભાષામાં મદદ પૂરી પાડે છે.

જો તમે ઘરેલુ હિંસાનો સામનો કરી રહ્યાં હો અને તમને તાત્કાલિક સહાયતાની જરૂર હોય તો તમે સહભાગી ફાર્મસીમાં 'ઍનિ માટે પૂછો' માટે વિનંતી કરી શકો છો. 

જો ફાર્મસીમાં 'ઍનિ માટે પૂછો' લોગો દર્શાવેલો હોય તો તેનો અર્થ એ છે કે તેઓ સહાયતા કરવા માટે તૈયાર છે. તેઓ તમને સેફ સ્પેસનો (Safe Space) પ્રસ્તાવ આપશે, ફોન આપશે અને તમને પોલીસ અથવા અન્ય ઘરેલુ હિંસા માટેની સહાયતા સેવાઓની મદદની જરૂર છે કે કેમ તે પૂછશે. 

તમારી સાથે એક પીડિત તરીકે વ્યવહાર કરવામાં આવશે, પછી ભલે તમારી ઇમિગ્રેશનની સ્થિતિ ગમે તે હોય.

જો તમારી પાસે સ્પાઉઝલ અથવા પાર્ટનર વિઝા હોય અને જેમાં તમારી સાથે દુર્વ્યવહાર થઈ રહ્યો હોય એવો સંબંધ છોડવાની જરૂર હોય તો તમે ત્રણ મહિના માટે રહેવાની
કામચલાઉ પરવાનગી માટે અરજી કરી શકો છો, જેનો ઉપયોગ તમે UKમાં સ્વાસ્થ્યસંભાળ, સામાજિક નિવાસ અને લાભો મેળવવા માટે કરી શકો છો. આ ડૅસ્ટિટ્યૂશન ડૉમેસ્ટિક વાયોલન્સ કન્સેશન કહેવાય છે. તમે ડૉમેસ્ટિક વાયોલન્સ ઇન્ડેફિનિટ લીવ ટુ રિમેઇનના (ઘરેલુ હિંસાના ભોગ બનેલાઓ માટે અમર્યાદ સમય માટે રહી શકાય તે અંગે) નિયમો હેઠળ કાયમી વિઝા માટે પણ અરજી કરી શકવા સક્ષમ હોઈ શકો છો. 

જો તમે ડૅસ્ટિટ્યૂશન ડૉમેસ્ટિક વાયોલન્સ કન્સેશન માટે લાયક ન હોવ તો તમે સપોર્ટ ફૉર માઇગ્રન્ટ્સ વિક્ટિમ્ઝ સ્કીમ મેળવવા સક્ષમ હોઈ શકો છો. આ સ્કીમ પ્રવાસી પીડિતો માટે સ્વતંત્ર વિશિષ્ટ ઘરેલુ હિંસા અંગેની સેવાઓ દ્વારા ચલાવવામાં આવે છે અને તેઓ કામચલાઉ રહેઠાણ, ખોરાક, કાઉન્સેલિંગ, કાનૂની સહાયતા અને ઇમિગ્રેશન તથા સોશિયલ કેયરની સલાહ પૂરી પાડે છે. તે આ ભાષાઓમાં સહાયતા પૂરી પાડે છે: અંગ્રેજી, હિન્દી, પંજાબી, ગુજરાતી, બંગાળી અને ઉર્દૂ અને અન્ય ભાષાઓના દુભાષિયાઓની સેવા લેવામાં આવી શકે છે. 

તમારી સ્થાનિક સપોર્ટ માઇગ્રન્ટ્સ વિક્ટિમ્ઝ સ્કીમ ક્યાં છે તે અહીં શોધો : https://southallblacksisters.org.uk/support-for-migrant-victims-scheme-smv-scheme/

જો તમે એવી પરિસ્થિતિ વિશે વિચારી શકો, જેમાં તમારા વર્તનને કારણે કોઈ વ્યક્તિને દુ:ખ થયું હોય, તે વ્યક્તિ નિયંત્રિત થઈ હોય કે તે વ્યક્તિ પર દબાણ કર્યું હોય તો પોતાની સાથે પ્રામાણિક રહો. સારું પરિવર્તન લાવવા માટેનું તે એક પ્રથમ પગલું છે.

દાખલા તરીકે, શું તમે ક્યારેય:

• તમારા મિત્રો સમક્ષ કોઈ સ્ત્રી વિશે તે સ્ત્રીની હાજરીમાં કે તેની પીઠ પાછળ જાતીય ટિપ્પણીઓ કરી છે?
• કોઈ સ્ત્રી વિશે એવી સાંકેતિક ટિપ્પણીઓ કરી છે, જ્યારે આવી ટિપ્પણીઓ બિલકુલ આવકાર્ય ન હોય?
• કોઈ વ્યક્તિ ક્યાં જઈ રહી છે તેનું અનુસરણ કર્યું છે કે તેનો પીછો કર્યો છે?
• કોઈ સ્ત્રી પર (તમારાં સાથી સહિત) સેક્સ કરવા માટે દબાણ કર્યું છે?
• નોકરી પર કોઈ સ્ત્રીને તમારી સાથે એકલી હોવા દરમિયાન અસ્વસ્થતા, અપસેટ કરવી કે ડરનો અનુભવ કરાવ્યો છે?
• તમારાં સાથીની જાણ વિના તેની કોઈ અંગત તસ્વીર કોઈને આપી છે કે બતાવી છે?
• તમારાં સાથીને તમે સતત કહ્યા કર્યું છે કે તું તારા મિત્રો સાથે બહાર જાય તે મને ગમતું નથી અથવા તેને કહ્યું છે કે તારે શું પહેરવું જોઈએ કે ન પહેરવું જોઈએ?
• તમારાં સાથી તમારાથી ડરેલા હોય એવું જોયું છે?  

દુર્વ્યવહાર અંગે સ્વીકાર કરવો મુશ્કેલ હોઈ શકે છે.

આવું વર્તન ખોટું છે એવો સ્વીકાર કરીને તમે જવાબદારી લઈ રહ્યા છો અને બદલાવ પસંદ કરી રહ્યા છો.

તમે કઈ રીતે બદલાઈ શકો?

• હંમેશાં સ્ત્રીઓ અને છોકરીઓ સાથે સમકક્ષ તરીકે વ્યવહાર કરો, એવી વ્યક્તિઓ તરીકે નહિ જેને અંકુશમાં રાખવાની હોય.
• સમજો કે કેટલીક બાબતો સ્વીકાર્ય હોતી નથી. દાખલા તરીકે, રસ્તા પર સ્ત્રીઓ અને છોકરીઓ તરફ જાતીય રીતે અભદ્ર ટિપ્પણીઓ કરવી. તમને આમાં કશું ખોટું ન હોવાનું લાગે, પરંતુ તે ધાકધમકીભર્યું અને ડરાવનારું હોઈ શકે છે.
• રસ્તા પર, ટ્રેન કે બસમાં સ્ત્રીઓ અને છોકરીઓને અવકાશ આપો. સાર્વજનિક જગ્યાઓમાં સ્ત્રીઓ ઘણી વખત સતત સાવધ હોય છે, તેથી આમ કરવાથી તેઓને વધુ સુરક્ષિત અનુભવવામાં મદદ મળી શકે છે.
• એવું ધારી ન લેશો કે તમે સેક્સ માટે હકદાર છો - તમે હકદાર નથી. સંમતિ વિના સેક્સ કરવું એ જાતીય હુમલો અથવા બળાત્કાર છે. માત્ર સ્પષ્ટ અને ઉત્સાહભરી 'હા' સાથે જ સંમતિ આપી શકાય. મૌન સહિતની અન્ય કોઈ પણ બાબત એ 'ના' છે જેનો આદર કરવો જ જોઈએ.
• એવું ન વિચારશો કે સેક્સ એ પૉર્નોગ્રાફી જેવું હોવું જોઈએ. જેમ ફિલ્મો એ વાસ્તવિક જીવન નથી તેમ પૉર્નોગ્રાફી એ વાસ્તવિક સેક્સ નથી. પારસ્પરિક સંમતિ અથવા સંવાદ વિના તે ઘણી વખત સ્ત્રીઓ તરફનું હાનિકારક વર્તન સૂચવે છે.

અન્ય કોઈ વ્યક્તિના વર્તનથી ચિંતિત છો?

ભીડની વિરુદ્ધ જવું મુશ્કેલ લાગી શકે છે, પરંતુ તે કરવા યોગ્ય બાબત છે. પહેલ કરવા અને બોલવા માટે એક વ્યક્તિની જ જરૂર પડે છે. એવી વ્યક્તિ બનો.

જો તમારે બાળકો હોય તો

ઘરેલુ હિંસાને કારણે બાળકો અને યુવા લોકો પર વિનાશકારી અસર થઈ શકે છે.

ડૉમેસ્ટિક અબ્યૂઝ ઍક્ટમાં બાળકોને તેમના પોતાના અધિકારમાં ઘરેલુ હિંસાના પીડિતો તરીકે ઓળખવામાં આવ્યા છે, જેમાં તેઓ દુર્વ્યવહાર જુએ, સાંભળે અથવા તેની અસરોને અનુભવે અને તેનો સંબંધ પીડિત અને/અથવા દુર્વ્યવહાર કરનાર સાથે છે.

તમારાં બાળકોને એકમેકનો આદર કરવાનું, હાનિકારક વર્તન વિરુદ્ધ ઊભા રહેવાનું અને સંમતિનું મહત્ત્વ સમજાવો.

તેઓ મોટા થઈને વધુ સારી દુનિયા જુએ તે માટે તમે તમારાથી બનતું કરી શકો છો.